ün octopus conquista il trun

Il plaid da la dumengia - La Quotidiana als 30 da lügl 2010

Il rai secret da noss dis nu porta ingüna curuna – na d’or e neir da spinas. Ma schabain cha’ls segns da sia pussanza sun invisibels sülla prüma vista, ha quist rai d’incuort muossà sia forza in maniera impreschiunanta. Quist imperatur modern ha nom ballapè ed ha regnà bod tuottafat nossa vita e la vita da contemporans indombrabels dürant ün pêr eivnas. La lavur d´iminchadi stuvaiva far adüna darcheu üna posa a favur da las emischiuns da televisiun, ed eir la dumengia es statta regularmaing occupada da quel regent.

Ma eir quist rai, chi paraiva tuotpussant, ha chattà finalmaing seis maister: Üna bes-cha dad ot tentaclas ha dominà las lingias grassas da las gazettas a la fin dal champiunadi mundial. Ün octopus ascendaiva il trun. Seis nom Paul deriva oriundamaing dal apostel. Ed üna auctorità congualabla cul Paulus biblic ha´l gnü sainza dubi. Sias prognosas pels gös da la squadra da Germania gnivan accumpagnadas plain veneraziun e d’eiran propcha sainza sbagl. Teams da televesiun dal mound inter celebraivan il spectacul cur cha Paul as decidaiva actualmaing per ün da duos pots da coquiglias. Cun mincha prognosa correcta guadagnaiva’l milliuns da nouvs aderents in tuots pövels.

Ün impissamaint curius am vain adimmaint in quist connex: Gesu vaiva cuntschaintamaing dudesch discipuls e scolars, Paul l’octupus invezza approximativ dudesch milliuns. La dumanda spontana saja permissa: sun quia las proporziuns amo in uorden ?

I’s po natüralmaing verer la chosa davart l’octopus cun ögls fich critics. In quist cas  as preschainta l’arrandschamaint in l’aquari da la cità tudais-cha Oberhausen sco alch chi’d es ridicul o perfin superstizius. Nu vess ün cristian da saglir sü per las paraids cur ch’el guarda sün quist sot intuorn il vadè d’or.

Ma tenor meis parair es la pointa da l’istorgia da Paul ün’otra: ils rais da quist muond vegnan e van – i sajan il ballapè o ils Pauls. Ma ün rai, chi merita il nom „rai“ in ün möd singular, resta adüna e per saimper: il Segner.

Chi chi sa rier da cour sur da las activitats dal octopus, es eir capabel da giodair il ballapè sco üna roba agreabla e fascinanta, ma na essentiala pella vita. Perquai stuvessna esser grats vers Paul: el ha rapinà la curuna da la testa dal rai ballapè – e tilla ha’l dat inavo al rai dret, al Segner. Paul ha vairamaing conquistà il trun, però na per sai svess, bleranzi pel Segner. Quai nun es surpredent causa cha Paul es üna creatüra da Dieu – na daplü e na damain.

David Last, ravarenda refuormà a Puntraschigna