Da la Porta Alpina a la Porta divina

(publichà illa gazetta La Quotidiana als 23 da schner 2009)

Pel mumaint guarda la situaziun oura uschè cha’l proget renomnà da la Porta alpina saja fini e sepuli e restetta displaschaivelmaing üna visiun grandiusa sainza schanza da gnir realisada.

L’idea oriunda però es adüna amo ourdvart fascinanta: da s-chaffir üna colliaziun svelta, sgüra e curaschusa tanter regiuns tuottafat differentas ed umans esters. Muntagnas nu dessan esser ingüns impedimaints. Be la vöglia dombra. Be il böt stimulescha e güda da survendscher tuots dubis. 

Intant s’ha müdada la sceneria. Scrupels dandets davart las financas han pudü fermar il tren da victoria da quels plans impreschiunants. Il curaschi da plü bod es svantà.

Oramai cha’l proget es interruot, vaina uossa l’occasiun da star salda e da tadlar üna vusch chi fa darcheu vast e liber l’orizont.  

Il pled biblic sur da l’on 2009 deriva da la bocca da Gesu svess e tuna: „Chosas impussiblas als umans sun pussiblas a Dieu“ (Lucas 18,27). Quista sentenzcha tendscha in üna profundità immensurabla: Ingio cha portas paran esser serradas, sa’l Segner tillas drivir.

Insè cugnuoscha Dieu eir ün proget cun nus umans chi ha da chefar cun craps e fouras, cun s-chürdüm e glüm, cun colliaziuns ed inscunters, cun fadia e dischillusiun, cun ambiziuns e spranzas.

Nos Dieu chava tunnels per arrivar a cours indürits. Ed el driva seis agen cour uschè cha minchün po portar seis arövs e giavüschs laint. Quista porta es e resta averta. Ils raps nu quintan per furtüna dafatta brich.

Sainz’explosiuns e squassadas nu vaja però neir quia cur cha Dieu lavura ed as fa via vers ün cour uman bloccà.

I darà adüna darcheu accidaints, cuntracuolps, vias orbas e malinclettas. A la fin però festagiaran Dieu ed uman sia comunità fundada danövmaing. 

Han ils initiants da la Porta alpina la listessa pazienzcha e la listessa perseverenza sco il maister celestial pro l’ouvra da l’avertüra da la Porta divina ?

Eventualmaing es il proget da la Porta alpina in fat mort e passà. Quai füss puchà, il proget vess merità ün meglder resultat.

Ün oter proget invezza nu po gnir desdrüt: la porta divina tanter il Segner e nus umans. 

Illa glüm da quist proget divin, chi reuschischa adonta da tuottas resistenzas, pon gnir tuttas per mans eir las lavuors multifarias d’iminchadi sül muond. Pussibelmaing ha eir la Porta alpina ün avegnir – suot il tet ed illa forza da la Porta divina.

David Last, ravarenda refuormà a Puntraschigna